Harry Ling，你明明post左喺我個wall， 又delete佢， 搞到我一朝早番到屋企又要再搵番出黎再post過，好眼訓呀大佬！不過多謝你咁細心，你都係知道我入唔到圍，驚我唔開心，先del左佢姐。
但係報港姐入唔到圍，其實唔係醜事，根本無野值得唔開心。我覺得相裏面嘅女仔個個都好靚、好可愛、好勇敢。特別一班真係香港土生土長嘅港女，香港呢個小農大都會，充滿歧視，番到公司學校俾人指指點點都唔好受㗎，你估係人都夠膽選港姐呀！(所以TVB今次都幾恨心......)
老實講，我入到second in，仲要見晒報咁，我好開心㗎喇，對自己對其他人都叫做有個交代。因為的確有唔少人問我：「你想做演員，點解唔去選港姐？」，咁當然都有好多朋友知道我去報名，覺得好unbelievable啦。
我的確唔係選港姐嘅材料，以我嘅智商，我一定出醜。而我報名參選，當然有我嘅原因。第一，人一世物一世吖嘛，更何況作為一個演員，唔傷身唔犯法嘅事都應該試下。第二，我真係講過我會去選港姐，我講過嘅事我會做，我唔想對我自己，同對身邊嘅人信囗開河。第三，我真係好鍾意演戲。我唔係學院畢業，無論係學歷同能力上，我想成為一個舞台劇演員，其實好難。我想拍電影咩，請問有幾多個顏卓靈吖。好，我入電視台，咁香港得一個電視台嘅姐，而好明顯港姐出生機會多好多，訓練班出黎捱到皺皮都無得你做女主角。咁係咪一定要做女主角先？「沒有小角色，只有小演員」吖嘛！係，演戲唔一定要做主角，但係喺某啲環境下，除左主角，其他人係無得演戲㗎。
所以我覺得如果我成日口口聲聲話自己好鍾意演戲，但係我連咁小事都怕，而唔俾自己去爭取一個演戲嘅機會的話，咁我諗我唔鍾意演戲囉。因為鍾意一樣野，係會令你咩都唔驚。
好多事情，結果我控制唔到，不竟我條件有限。我唯一可以做嘅就係勇敢同盡力去嘗試，嘗試喺有限嘅可能裏面尋找我無限嘅可能性。朋友，別擔心，我想選港姐，唔係我變質，而係我相信我嘅信念。直至現在，我無忘記點解我想成為一個演員。
最後，老土啲都要講，真係一個好有趣嘅經驗黎嘅，同埋真係好開心認識到大家。
人生總要報一次港姐。
Search